Канон молебный преподобному Никифору Прокаженному, чудотворцу.
Благословившу священнику, начинаем по обычаю начальные молитвы: Царю Небесный: Трисвятое. Пресвятая Троице: Отче наш:
Иерей: Яко Твое есть Царство:
Господи, помилуй, 12. Слава, и ныне. Приидите, поклонимся: трижды.
Также: Псалом 142:
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой; посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния; поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, исчезе дух мой; не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах; скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой; Дух Твой Благий наставит мя на землю праву. Имене Твоего ради, Господи, живиши мя; правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей: яко аз раб Твой есмь.
Слава, И ныне: Бог Господь: со стихи.
Таже тропарь, глас 4:
Плоти твоея прокажние / мужемýдренно, яко Иов, претерпéл еси, Ники́форе, / ризу же души́ твоея свéтле очистил еси, / совершéнне же на лéствицу добродéтелей восшéд, / пóдвиги твоими жительства Ангельскаго достигл еси, / непрестáнно Богу поя: // Тебé слáва подобáет, Трóице Единосýщная.
Слава, И ныне, Богородичен, глас тойже:
Не умолчим никогда, Богородице, / силы Твоея глаголати, недостойнии, / аще бо Ты не бы предстояла молящи, / кто бы нас избавил от толиких бед, / кто же бы сохранил доныне свободны? / Не отступим, Владычице, от Тебе, / Твоя бо рабы спасаеши присно от всяких лютых.
Псалом 50 и канон, глас 2, поется без ирмосов на 4.
Песнь 1.
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Припев: Преподобне отче Никифоре, моли Бога о нас.
Кротких землю достиг, отче, яко кроток, и милостив, и чист быв, настоящую сердца моего укроти бурю, яко да, в тишине Божественней быв, песнословлю тя.
Припев: Преподобне отче Никифоре, моли Бога о нас.
Плоти твоя болезнь терпеливно снося, отче, сраспялся еси распятому нас ради Христу; умертвився же мирови, к жизни нетленней прешел еси.
Слава Отцу и Сыну и Святому Духу:
Невозможно изрещи чудес множества, яже соделал еси, Никифоре блаженне, еще в жизни ходя и к Богу прешед, досточудне.
И ныне и присно и вовеки веков. Аминь.
Богородичен: Десница Твоя, Влады́чице, прославися в крепости, и множеством милости Твоея явилася еси Покровительница и Изба́вительница во спасение бе́дствовавших.
Песнь 3.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.
Припев: Преподобне отче Никифоре, моли Бога о нас.
На гору возшедшу ти добродетелей, возсия нам светло луча чудес твоих и деяний, отче всечудне, сего ради на милости твоя уповаем.
Припев: Преподобне отче Никифоре, моли Бога о нас.
Исполнь Духа Святаго и ум на Небо простер, о тленней пищи не попеклся еси, отче, но хлебом ангельским питался еси.
Слава Отцу и Сыну и Святому Духу:
Вод исполнь быв Божия Духа, реки то́чиши исцелений, Никифоре святе, и море страстей изсушаеши с верою к тебе притекающим.
И ныне и присно и вовеки веков. Аминь.
Богородичен: Исцели душу мою, стрелами страстными уя́звленную, Богородице, матернею Твоею молитвою Божественное врачевание прилагающи.
Поем катавасию:
Моли Бога о нас, / преподобне отче Никифоре, / яко мы усердно к тебе прибегаем, / скорому помощнику и молитвеннику о душах наших.
Призри благосердием, Всепетая Богородице, / на мое лютое телесе озлобление / и исцели души моея болезнь.
Ектения: Помилуй, нас, Боже: и седален, глас 6:
Дивному Богу, тобою присно чудеса творящему, / молися, Никифоре Богодухновенне, / да удивит на нас милости Своя // и подаст нам прегрешений оставление.
Слава, И ныне, Богородичен, глас тойже:
Архангельское слово прияла еси, / и Херувимский престол показалася еси, / и на объятиих Твоих носила еси, Богородице, // Надежду душ наших.
Песнь 4.
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Припев: Преподобне отче Никифоре, моли Бога о нас.
Изнемогающих исцели, отче предивне, в напастех сущих исхити и от бед свободи твоими молитвами.
Припев: Преподобне отче Никифоре, моли Бога о нас.
Процвел еси, якоже лилия в терниих болезни твоея, и Бога возвеличил еси вонями подвигов твоих, благоухая нам ныне чудес благодатию.
Слава Отцу и Сыну и Святому Духу:
Помыслом разсуждая преподобным, воспеваше Никофор Иовлевыми словесы: благая приемше от Господа, болезненная доблественно не стерпим ли? Слава силе Твоей, Господи.
И ныне и присно и вовеки веков. Аминь.
Богородичен: Пречистая, Святая Дево, Богородице, всяку болезнь душ и телес и всякую злую напасть отжени от нас молитвами Твоими.
Песнь 5.
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, Бога не знаю.
Припев: Преподобне отче Никифоре, моли Бога о нас.
Господь возвеличи тя в мире, благодать подаде врачевати недуги и язвы неисцельныя, сего ради на помощь твою, Никифоре, уповаем.
Припев: Преподобне отче Никифоре, моли Бога о нас.
Якоже юне́ц, ярем Господень понес и души твоей землю удобрив, плоды благодатные в терпении твоем принесл еси, имиже питаеши верных сердца.
Слава Отцу и Сыну и Святому Духу:
Посещати нас от небесныя высоты не престай, преподобне, отгоняя всю житейскую тесноту, к Богу твоими молитвами.
И ныне и присно и вовеки веков. Аминь.
Богородичен: Господородительнице Чистая, обладаема мя многими страстьми, яко Благая представши, избави от сих: яко да тя воспеваю душею и сердцем и языком, спасаемь.
Песнь 6.
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи
Припев: Преподобне отче Никифоре, моли Бога о нас.
Не остави мене, блаженне отче, без заступления, но простри мне яко милостив помощи руку, и помози мне.
Припев: Преподобне отче Никифоре, моли Бога о нас.
Болезни твоя, отче треблаженне, неболезненную жизнь в царстве Христовом исхода́таиша тебе, еяже и нас причастники быти сподоби твоими молитвами.
Слава Отцу и Сыну и Святому Духу:
Не озлобился еси и не поколебался еси в вере, отче прехвальне, струпы зря на телесе своем, душу же свою цвета́ми добродетелей украси́л еси.
И ныне и присно и вовеки веков. Аминь.
Богородичен: Исцели наша недуги душевная и телесная, Богородительнице Чистая, да поживем по заповедем Сына Твоего, славословие Ему всегда приносяще и хвалу делы своими.
Поем катавасию:
Моли Бога о нас, / преподобне отче Никифоре, / яко мы усердно к тебе прибегаем, / скорому помощнику и молитвеннику о душах наших.
Призри благосердием, Всепетая Богородице, / на мое лютое телесе озлобление / и исцели души моея болезнь.
Также ектения малая. Кондак, глас 2:
Узким путем болезни шествовал еси, Никифоре, / последовав всецело Господу твоему, / яко сын достойный, / иго легкое и бремя благое на рамех понесл еси / и вшел еси, радуяся, в вечную славу, // и чудесы от Христа прославился еси.
Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Матфея, зачало 43.
Слава: Молитвами преподобнаго Никифора, / Милостиве, очисти / множество согрешений наших.
И ныне: Молитвами Богородицы, / Милостиве, очисти / множество согрешений наших.
Помилуй мя, Боже, по велицей милости Твоей / и по множеству щедрот Твоих / очисти беззаконие мое.
Стихира, глас 6:
Желание души моея ве́си, чудотворче Никифоре, / и любовнаго к тебе огня опалением разжженна мя видиши:/ разрешение грехов прияти ми даруй // и всякаго прошения исполнение.
Диакон глаголет молитву сию:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепричистыя Владычицы нашея Богородицы и Приснодевы Марии; силою Честнаго и Животворящего Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных всехвальных Апостол; иже во святых отца нашего Николая Мирликийскаго, Чудотворца; святых славных и добропобедных мучеников, преподобных и богоносных отец наших, святых и праведных Богоотец Иоакима и Анны [и святаго (имя), его же есть храм] и преподобнаго отца нашего Никифора чудотворца и всех святых; молим Тя, Многомилостиве Господи, услыши нас, грешных, молящихся Тебе, и помилуй нас. Лик: Господи, помилуй, 12 раз. Возглас: Милостию и Щедротами:
Песнь 7.
Ирмос: Богопротивное веление беззаконнующаго мучителя высок пламень вознесло есть; Христос же простре Богочестивым отроком росу духовную, Сый благословен и препрославлен.
Припев: Преподобне отче Никифоре, моли Бога о нас.
Единообра́зну со Иовом праведным болезнь имея, смиренно сносил еси плоти страдания, Богу же поя: Сый благословен и препрославлен.
Припев: Преподобне отче Никифоре, моли Бога о нас.
Миру распятие претерпев и плотския уды умертвив, блаженне, нектому же жил еси, токмо Христу, спасающему тя, Ему же и взывал еси: Сый благословен и препрославлен.
Слава Отцу и Сыну и Святому Духу:
Мощи твоя, якоже рай благоухают, отче предивне, и исцеляют недуги, верою вопиющим Христу: Сый благословен и препрославлен.
И ныне и присно и вовеки веков. Аминь.
Богородичен: Ты еси крепость наша, Пречистая Владычице, и в наше́дших неча́емых ско́рбех утешение, и сего ради мы, раби Твои, всенадежно вопием Тебе: помилуй нас, Дево Марие Чистая.
Песнь 8.
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющыя: благословите, вся дела Господня, Господа.
Припев: Преподобне отче Никифоре, моли Бога о нас.
Украшением чудес одеян, Никифоре всеславне, явился еси прибежище страждущим, болезнующим и отчаяным, воздвигая их спасающему Богу пети: благословите, вся дела Господня, Господа.
Припев: Преподобне отче Никифоре, моли Бога о нас.
Чудес Божественное дарование источает тело твое девственное и многоболезненное, отче Никифоре блаженне, всем твоея помощи просящим и с тобою поющим: благословите, вся дела Господня, Господа.
Слава Отцу и Сыну и Святому Духу:
Уз телесных, яко мертв, разрешился еси, отче, но, яко жив, неруши́м пребываеши, многолетныя реша́ болезни силою смерть претерпевшаго Владыки Христа, Емуже поем: благословите, вся дела Господня, Господа.
И ныне и присно и вовеки веков. Аминь.
Богородичен: Струи́ исцелений нам всегда, Чистая, источаеши: темже незави́стную благодать взе́млюще, воспева́ем рождшемуся от Тебе Христу: благословите, вся дела Господня, Господа.
Песнь 9.
Ирмос: Безначальна Родителя Сын Бог и Господь, воплощься от Девы нам явися, омраченная просветити, собрати расточенная, тем Всепетую Богородицу величаем.
Припев: Преподобне отче Никифоре, моли Бога о нас.
Молитву предстояния нашего прими, Никифоре отче блаженне, и поспеши избавити нас от напастей и скорбей.
Припев: Преподобне отче Никифоре, моли Бога о нас.
Чудес источниче, преподобных украшение, умоли Благаго Человеколюбца, отче всечестне, да подаст нам велия Своя милости.
Слава Отцу и Сыну и Святому Духу:
Избави всех нас, Владыко Христе, от лютых болезней и благодать с Небесе ниспосли молитвами аввы Никифора пречуднаго, да присно славословие Тебе приносим.
И ныне и присно и вовеки веков. Аминь.
Богородичен: О, Преблагословенная Дево Богородице! Исцеление подаждь нам душевное и телесное, Пренепорочная, и болящим испроси грехов оставление.
Вместо Достойно есть: поем стих сей, глас 8:
Владычице, приими молитвы раб Твоих / и избави нас // от всякия нужды и печали.
И величания святому Никифору, глас 8:
Во плоти немощней дух бодрый сохраньшаго / Никифора всечуднаго песньми возвеличим, / от него дары благодатныя приемлюще, // прославим Христа Жизнодавца.
От многих грехов моих немощствует тело, / немощствует и страстьми обуреваемая душа моя. / К тебе прибегаю, Никифоре Богоблаженне, // возстави мя погибающаго и помилуй мя.
Исполни сердца моего желание, / чудес источниче Никифоре, / даруй мне благодать твою и от всякаго искушения избави, // теплыми твоими к Богу молитвами.
Посем Трисвятое: Отче наш:
Тропарь преподобному, глас 4:
Яко мертв, мирови сраспну́в плоть твою, / бремя прокажения безропотно понесл еси, / сном смертным уснул еси / и нерушим преминул еси многих лет течение, / жив в чудесех являешися, Никифоре блаженне, / тем тя молим: // исцели души и телеса наша.
Слава, И ныне, Богородичен, глас тойже:
Спаси́ мя, Дево Владычице, / из глубины напастей, и скорбей, / и печалей различных, и страстей телесных / и в тишине божественней // сохрани душу мою.
Ектения сугубая, юже глаголет диакон с кадилом и прочая по обычаю. И отпуст.
Молитва
О, добрый и милостивый, отче Никифоре! К тебе смиренно припадаем и усердно молимся: яви нам, грешным, любовь твою отеческую и многомощное твое и чудное заступление. Испроси предстательством твоим у Всемилостивого Бога нашего и Матери Его Пречистыя вся яже на пользу душам и телесем нашим, согрешений наших прощение и исправление, любовь нелицемерную, ревность о спасение нашем.
Сие прибавляем во время морового поветрия: Наипаче просим тя, отче преподобне: защити Отечество наше, град сей и людей, на твое предстательство уповающих, от морового поветрия и всякия болезни тяжкия. Исцели страждущих, укрепи малодушных, врачам пошли здравие и силы. Благослови нашу человеческую семью и изгони от нас всякое зло.
Да благодатию Божиею соблюдаеми и спасаеми, славу, благодарение и поклонение возсылаем Отцу и Сыну и Святому Духу, ныне и присно, и во веки веков. Аминь.
— текст канона предоставлен Свято-Ильинским мужским монастырем в Одессе