Степенны октоиха на 8 гласов
Степéнна, глáс 1
Антифóн 1:
Внегдá скорбéти ми́, услы́ши моя́ болéзни, Гóсподи, Тебé зовý.
Пусты́нным непрестáнное Божéственное желáние бывáет, ми́ра сýщым сýетнаго кромé[1].
Слáва: Святóму Дýху чéсть и слáва, я́коже Отцý подобáет, кýпно же и Сы́ну, сегó рáди да поéм Трóице единодержáвие.
И ны́не, тóйже.
Антифóн 2:
На гóры Твои́х вознéсл еси́ мя́ закóнов, добродéтельми просвети́, Бóже, да пою́ Тя.
Деснóю Твоéю рукóю прии́м Ты́ слóве, сохрани́ мя, соблюди́, да не óгнь менé опали́т грехóвный.
Слáва: Святы́м Дýхом вся́кая твáрь обновля́ется, пáки текýщи на пéрвое: равномóщен бо éсть Отцý и Слóву.
И ны́не, тóйже.
Антифóн 3:
О рéкших мнé, вни́дем во дворы́ Госпóдни, возвесели́ся мóй дýх, срáдуется сéрдце.
В домý Дави́дове стрáх вели́к: тáмо бо престóлом постáвленным, сýдятся вся́ племенá земнáя, и язы́цы.
Слáва: Святóму Дýху, чéсть, поклонéние, слáву и держáву, я́коже Отцý достóит, и Сы́нови подобáет приноси́ти: еди́ница бо éсть Трóица естествóм, но не ли́цы.
И ны́не, тóйже.
Степéнна, глáс 2.
Антифóн 1:
На нéбо óчи пущáю моегó сéрдца, к Тебé, Спáсе, спаси́ мя Твои́м осия́нием.
Поми́луй нáс согрешáющих Тебé мнóго, на вся́кий чáс, о Христé мóй, и дáждь óбраз прéжде концá покáятися Тебé.
Слáва: Святóму Дýху, Éже цáрствовати подобáет, освящáти, подвизáти твáрь: Бóг бо éсть, Единосýщен Отцý и Слóву.
И ны́не, тóйже.
Антифóн 2:
Áще не Госпóдь бы бы́л в нáс, ктó довóлен цéл сохранéн бы́ти от врагá, кýпно и человекоуби́йцы?
Зубóм и́х не предáждь Спáсе, Твоегó рабá: и́бо львóвым óбразом на мя́ подвизáются врази́ мои́.
Слáва: Святóму Дýху живоначáлие и чéсть: вся́ бо создáнная, я́ко Бóг сы́й си́лою (укрепля́ет) соблюдáет во Отцé, Сы́ном же.
И ны́не, тóйже.
Антифóн 3:
Надéющиися на Гóспода, уподóбишася горé святéй: и́же никáкоже дви́жутся прилóги врáжиими.
В беззакóнии рýк свои́х да не прóструт Божéственне живýщии: не оставля́ет бо Христóс жезлá на жрéбии Своéм.
Слáва: Святы́м Дýхом тóчится вся́ка премýдрость: отсю́ду благодáть апóстолом, и страдáльчествы венчáются мýченицы, и прорóцы зря́т.
И ны́не, тóйже.
Степéнна, глáс 3
Антифóн 1:
Плéн Сиóнь Ты́ изъя́л еси́ от Вавилóна: и менé от страстéй к животý привлецы́, Слóве.
В ю́г сéющии слезáми Божéственными, жнýт клáсы рáдостию присноживóтия.
Слáва: Святóму Дýху вся́кое благодáрие, я́коже Отцý и Сы́ну сооблистáет, в Нéмже вся́ живýт и дви́жутся.
И ны́не, тóйже.
Антифóн 2-й:
Áще не Госпóдь сози́ждет дóм добродéтелей, всýе труждáемся: дýшу же покрывáющу, никтóже нáш разори́т грáд.
Плодá чрéвна Дýхом сынотворéное Тебé, Христý, я́коже и Отцý, святи́и всегдá сýть.
Слáва: Святы́м Дýхом прозри́тся вся́кая святы́ня, премýдрость: осуществýет бо вся́кую твáрь: Томý послýжим, Бóг бо, я́ко Отцý же и Слóву.
И ны́не, тóйже.
Антифóн 3-й:
Боя́щиися Гóспода блажéни, в пути́ ходя́ще зáповедей: снедя́т бо живóтное всеплóдие.
Óкрест трапéзы Твоея́ возвесели́ся, зря́ Твоя́ Пастыреначáльниче исчáдия, нося́ща вéтви благодéлания.
Слáва: Святы́м Дýхом вся́кое богáтство слáвы, от Негóже благодáть, и живóт вся́кой твáри: со Отцéм бо воспевáемь éсть, и с Слóвом.
И ны́не, тóйже.
Степéнна, глáс 4.
Антифóн 1
От ю́ности моея́ мнóзи бóрют мя́ стрáсти, но Сáм мя́ заступи́, и спаси́ Спáсе мóй.
Ненави́дящии Сиóна, посрами́теся от Гóспода, я́ко травá бо огнéм бýдете изсóхше.
Слáва: Святы́м Дýхом вся́ка душá живи́тся, и чистотóю возвышáется, светлéется Трóическим Еди́нством священнотáйне.
И ны́не, тóйже.
Антифóн 2:
Воззвáх Тебé, Гóсподи, тéпле, из глубины́ души́ моея́, и мнé да бýдут на послушáние Божéственная Твоя́ ушесá.
На Гóспода надéжду вся́к ктó стяжáв, вы́шший éсть всéх скорбя́щих.
Слáва: Святы́м Дýхом тóчатся благодáтныя струи́, напая́ющя вся́ку твáрь ко оживлéнию.
И ны́не, тóйже.
Антифóн 3:
Сéрдце моé к Тебé, Слóве, да возвы́сится, и да ничтóже услади́т мя́ от мирски́х красóт на слáбость.
К мáтери своéй я́коже и́мать ктó любóвь, ко Гóсподу тéпльше люблéнием дóлжни есмы́.
Слáва: Святы́м Дýхом боговéдения богáтство, зрéния, и премýдрости: вся́ бо в сéм отéческая велéния слóво открывáет.
И ны́не, тóйже.
Степéнна, глáс 5.
Антифóн 1.
Внегдá скорбéти мнé, Дави́дски пою́ Тебé, Спáсе мóй: избáви дýшу мою́ от язы́ка льсти́ваго.
Пусты́нным живóт блажéн éсть, Божéственным рачéнием воскриля́ющымся.
Слáва: Святы́м Дýхом одержáтся вся́, ви́димая же с неви́димыми: Самодержáвен бо сы́й, Трóицы Еди́н éсть нелóжно.
И ны́не, тóйже.
Антифóн 2:
На гóры, душé, воздви́гнемся, гряди́ тáмо, отню́дуже пóмощь и́дет.
Деснáя Твоя́ рукá, и менé, Христé, касáющися, от лéсти вся́кия да сохрани́т.
Слáва: Святóму Дýху богослóвяще рцéм: Ты́ еси́ Бóг, Живóт, Рачéние, Свéт, Ум: Ты́ Благосты́ня, Ты́ цáрствуеши во вéки.
И ны́не, тóйже.
Антифóн 3:
О рéкших мнé: во дворы́ вни́дем Госпóдня: рáдости мнóгия испóлнен бы́в, моли́твы возсылáю.
В домý Дави́дове стрáшная совершáются: óгнь бо тáмо паля́ вся́к срáмный ýм.
Слáва: Святóму Дýху живоначáльное достóинство, от Негóже вся́кое живóтно одушевля́ется, я́ко во Отцé, кýпно же и Слóве.
И ны́не, тóйже.
Cтепéнна, глáс 6
Антифóн 1
На нéбо óчи мои́ возвожý, к Тебé, Слóве: ущéдри мя́, да живý Тебé.
Поми́луй нáс уничижéнных, устроя́я благопотрéбныя Твоя́ сосýды, Слóве.
Слáва: Святóму Дýху, вся́кая всеспаси́тельная винá, áще кóему Сéй по достоя́нию дхнéт, скóро взéмлет от земны́х: восперя́ет, возращáет, устроя́ет горé.
И ны́не, тóйже.
Антифóн 2:
Áще не Госпóдь бы бы́л в нáс, никтóже от нáс проти́ву возмóгл бы врáжиим брáнем одолéти: побеждáющии бо от здé вознóсятся.
Зубы́ и́х да не я́та бýдет душá моя́ я́ко птенéц, Слóве: увы́ мнé, кáко и́мам от врагá избы́ти грехолюби́в сы́й!
Слáва: Святы́м Дýхом обожéние всéм, благоволéние, рáзум, ми́р и благословéние: равнодéтелен бо éсть Отцý и Слóву.
И ны́не, тóйже.
Антифóн 3:
Надéющиися на Гóспода врагóм стрáшни, и всéм ди́вни: горé бо зря́т.
В беззакóния рýк свои́х, прáведных жрéбий, помóщника Тя́ имéя Спáсе, не простирáет.
Слáва: Святáго Дýха держáва на всéх: Емýже вы́шняя вóинства покланя́ются, со вся́ким дыхáнием дóльным.
И ны́не, тóйже.
Степéнна, глáс 7
Антифóн 1:
Плéн Сиóнь от лéсти обрати́в, и менé, Спáсе, оживи́, изъимáя рабóтныя стрáсти.
В ю́г сéяй скóрби пóстныя со слéзами, сéй рáдостныя пóжнет рукоя́ти присноживопитáния.
Слáва: Святы́м Дýхом истóчник Божéственных сокрóвищ, от Негóже премýдрость, рáзум, стрáх: Томý хвалá и слáва, чéсть и держáва.
И ны́не, тóйже.
Антифóн 2:
Áще не Госпóдь сози́ждет дóм душéвный, всýе труждáемся: рáзве бо тогó ни дея́ние, ни слóво совершáется.
Плодá чрéвна, святи́и духодви́жно прозябáют отéческая предáния, сыноположéния.
Слáва: Святы́м Дýхом, вся́ческая éже бы́ти и́мут: прéжде бо всéх Бóг, всéх Госпóдьство, Свéт непристýпен, Живóт всéх.
И ны́не, тóйже.
Антифóн 3:
Боя́щиися Гóспода, пути́ животá обрéтше, ны́не и при́сно ублажáются слáвою нетлéнною.
Óкрест трапéзы Твоея́, я́ко стéблие ви́дя исчáдия Твоя́, рáдуйся и весели́ся, приводя́ сия́ Христóви Пастыреначáльнику (пастыреначáльниче).
Слáва: Святы́м Дýхом глубинá даровáний, богáтство слáвы, судéб глубинá вéлия: единослáвен Отцý, и Сы́ну, служи́мь бо.
И ны́не, тóйже.
Степéнна, глáс 8
Антифóн 1:
От ю́ности моея́ врáг мя́ искушáет, сластьми́ пали́т мя́: áз же надéяся на Тя́, Гóсподи, побеждáю сегó.
Ненави́дящии Сиóна, да бýдут ýбо прéжде исторжéния я́ко травá: ссéчет бо Христóс вы́я и́х, усечéнием мýк.
Слáва: Святы́м Дýхом, Éже жи́ти вся́ческим: Свéт от Свéта, Бóг Вели́к: со Отцéм поéм Емý, и с Слóвом.
И ны́не, тóйже.
Антифóн 2:
Сéрдце моé стрáхом Твои́м да покры́ется смиреномýдрствующее: да не вознéсшееся отпадéт от Тебé, Всещéдре.
На Гóспода имéвый надéжду, не устраши́тся тогдá, егдá огнéм вся́ суди́ти и́мать, и мýкою.
Слáва: Святы́м Дýхом, вся́к ктó Божéственный ви́дит, и предглагóлет, чудодéйствует вы́шняя, в Триéх Еди́наго Бóга поя́: áще бо и трисия́ет, единоначáльствует Божествó.
И ны́не, тóйже.
Антифóн 3:
Воззвáх Тебé, Гóсподи, вонми́, приклони́ ми ýхо Твоé вопию́щу, и очи́сти, прéжде дáже не вóзмеши менé отсю́ду.
В мáтери своéй земли́ отходя́й вся́к, пáки разрешáется, прия́ти мýки, или́ пóчести пожи́вших.
Слáва: Святы́м Дýхом богослóвие, Еди́ница Трисвятáя: Отéц бо Безначáлен: от Негóже роди́ся Сы́н безлéтно, и Дýх Сопрестóлен, Сообрáзен, от Отцá спросия́вший.
И ны́не, тóйже.
Антифóн 4:
Сé ны́не чтó добрó, или́ чтó краснó; но éже жи́ти брáтии вкýпе: в сéм бо Госпóдь обещá живóт вéчный.
О ри́зе своéй, И́же кри́ны сéльныя украшáяй, повелевáет, я́ко не подобáет пещи́ся.
Слáва: Святы́м Дýхом, Единови́дною винóю, вся́ содержáтся мироподáтельне: Бóг бо Сéй éсть, Отцý же и Сы́нови Единосýщен Госпóдственне.
И ны́не, тóйже.
сýщым внé сýетнаго ми́ра ↩︎