О Молитве

Непреоборимый столп православия, иже во святых отец наш Григорий Палама, Архиепископ Фессалонитский, в слове на вход во храм Пресвятыя Владычицы нашея Богородицы и Присно Девы Марии, свидетельствуя о умней молитве глаголет:

Яко Пресвятая Дева Богородица, во Святая Святых пребывающи, и от писания Святаго по вся Субботы чтомаго, совершенне о погибающем преслушания ради рода человеческом уразумевши, и крайнее о нем милование приемши, умную восприят молитву ко Богу, во еще вскоре помиловати и спасти род человеческий. Сего же и самыя глаголы Ангельскаго разума достойныя, малым от многих, предлагаю, глаголюще тако:

Понеже Богоотроковица Сия Дева услыша же и виде, милование приемши общаго рода, и смотряющи исцеление и врачбу обрести, толикия страсти противообразну: ко Богу абие всем умом обратитися усмотре, юже о нас восприемши молитву. Еже понудити Непонужденнаго и к нам привлещи вскоре, яко да клятву Сам Той от среды истребит, и пажить уставит души растлевающаго огня, и Себе сосвяжет создание, немощное исцелив. Но сице убо благодатная Дева разсмотревши Себе приличншая и свойственшая во всяком естестве, умную молитву, яко чудну и преславну и всякаго слова лучшу, полагаше: ищуще уже, како художне и свойственне побеседует Богу, в Немуже Саморукоположная, паче же Богоизбранная прихождаше молитвенница. Елма убо ничтоже усмотряше от сущих, лучше сея прибывших человеком: к молению простирающися зельно со опасством, новотворит большая и совершеншая, и изобретает, и действует, и сущим иже по сих преподавает деяние убо, к видению восхождение величайшее; видение же толико большее от преже рекомаго, елико мечтания высши есть истина. Но совокупльшеся убо вси в себе, и ум очистивши, услышите уже таинства величество; ибо пользующее все убо Христоименитое исполнение, или паче же отрекшимся міра хощу слово рещи.

Отречения же ради вкусивший уже что будущих оных благ, иже и со Ангелы стает, и жительство на небесех стяжевает: сей подражати да восхощет по силе первую и Едину от младенства отрекшуюся о мире міра присно Деву Невесту. Сие убо ищущи Дева, яко нуждншее молитвенником к собеседованию, имже бывает молитва, священное безмолвие обретает: безмолвие ума, и міра разстояние, забвение дольних и таинника горних разумений на лучшее преложение: сие бо деяние, яко воистину восхождение ко видению Сущаго воистину, или паче истинше реши, к Боговидению есть аки кратко указание души стяжавшаго е воистину.

Добродетель же убо всяка ина, якоже врачевание есть примениельно недугов душевных и от уныния вкорененных лукавых страстей: Боговидение же есть здавствующия души плод, аки некое совершение конечное суще и образ Богодеяний. Сего ради убо боготворится человек не от словес, или от видимых смотрительнаго умерения, землено бо сие, и смирено, и человеческо: но от еже в безмолвии пребывания, яко того ради отрешаемся и отпущаемся дольних и восходим к Богу. И якоже на горнице безмолвнаго жития; нощию же и днем молитвами же и моленми претерпевающе приближаемся некако и приступаем к Неприступному оному и блаженному Естеству. И сице сиреч терпящим тем срастворившуся неизреченно Сущему паче чувства и ума свету в себе, якоже в зерцале зрят Бога, сердце сщенным безмолвием очистившии. Еже скорое и сокращенно указание, яко успешнее и Богу соединяющее, наипаче держащихся тако по всему отнюд. А яже от мягких, якоже реши, ногтей, сему спребывающая Дева, сия что; Сия, понеже от тако зело детскаго возраста превышеестественне безмолвствоваше, того ради Едина от всех Богочеловека Слово неискусомужно породи.

Сего ради и Пречистая, от самого якоже рещи житейскаго пребывания и молвы отрицающися, от человек преселися и виновнаго избегши жития, невидимую всем и несочетанную изволяше жизнь, пребывающи в невходных: в нихже вещнаго всяаго соуза резрешившися, и всякое приобщение и любовь ко всем отрясши, и того самаго еже к телеси своему милования превозшедши, совокупи ум к самому Того сообращению и пребыванию и вниманию и непрестанней Божественней молитве. И тоя ради сама в себе бывши, и многообразнаго мятежа и промышления и просто всякаго вида и вещи превыше устроившися, нов и неизречен путь на небеса творяше, иже есть, да сице реку, мысленное молчание. И сему прилежащи и внимающи умом, вся прелетает создания и твари, и лучше паче неже по Моисею, славу зрит Божию, и божественную назирает благодать, никакоже чувства сил подлежащую, душ же и умов нескверных благорадостное и священное видение, емуже причастишися, по Божественным Песнопевцем, светлый облак бывает сущия воистину живыя воды, Заря же мысленнаго дне и огнеобразная Колесница Слова.

До зде Святый Григорий.

От сих словес Божественнаго Григория Паламы ум имущему паче солнца яснейше мощно разумети, яко Пресвятая Дева Богородица, во Святая Святых пребывающи, умною молитвою на крайнюю высоту Боговидения взыде, Божественному, Ангельскому монашескому чину, ко опасному по внутреннему человеку житию, о мире міра отречением, священным ума безмолвием, мысленным молчанием и к непрестанней Божественней молитве и вниманию ума совокуплением, деяния же к Боговидению восхождением Сама Собою образ давши: да на Ню отрекшиися міра монаси взирающе, в предреченных монашеских умных трудех и потех усердно тщатся, елико по силе, Ея молитвами, Ея подражательми быти. И кто возможет по достоянию Божественную умную похвалити молитву, еяже и Сама Мати Божия, якоже речеся, руководствием Святаго Духа наставляема, во образ пользы и успеяния монахов, делательница бяше.

— свт. Григорий Палама

Источник: http://old.stsl.ru/manuscripts/medium.php?col=2&manuscript=202&pagefile=202-0108