Собрание заповедей Христа из Евангелия по Матфею для того чтобы было удобнее поучаться в них (собрание отрывков приводиться по книге «Цветник священноинока Дорофея»)

Блажени нищии духом: яко тех есть Царствие Небесное.

Блажени плачущии: яко тии утешатся.

Блажени кротцыи: яко тии наследят землю.

Блажени алчущии и жаждущии правды: яко тии насытятся.

Блажени милостивии: яко тии помиловани будут.

Блажени честии сердцем: яко тии Бога узрят.

Блажени миротворцы: яко тии сынове Божии нарекутся.

Блажени изгнани правды ради: яко тех есть Царствие Небесное.

Блажени есте, егда поносят вам, и ижденут, и рекут всяк зол глагол на вы лжуще, Мене ради: радуйтеся и веселитеся, яко мзда ваша многа на небесех: тако бо изгнаша пророки, иже (беша) прежде вас. (Мф. 5:3-12)

Аз же глаголю вам не противитися злу: но аще тя кто ударит в десную твою ланиту, обрати ему и другую

и хотящему судитися с тобою и ризу твою взяти, отпусти ему и срачицу

и аще кто тя поймет по силе поприще едино, иди с ним два

Просящему у тебе дай, и хотящаго от тебе заяти не отврати. (Мф. 5:39-42)

Аз же глаголю вам: любите враги вашя, благословите кленущыя вы, добро творите ненавидящым вас, и молитеся за творящих вам напасть и изгонящыя вы, яко да будете сынове Отца вашего, Иже есть на небесех: яко солнце Свое сияет на злыя и благия и дождит на праведныя и на неправедныя.

Аще бо любите любящих вас, кую мзду имате? Не и мытари ли тожде творят? И аще целуете други вашя токмо, что лишше творите? Не и язычницы ли такожде творят?

Будите убо вы совершени, якоже Отец ваш Небесный совершен есть. (Мф. 5:44-48)

Не скрывайте себе сокровищ на земли, идеже червь и тля тлит, и идеже татие подкопывают и крадут: скрывайте же себе сокровище на небеси, идеже ни червь, ни тля тлит, и идеже татие не подкопывают, ни крадут: идеже бо есть сокровище ваше, ту будет и сердце ваше. (Мф. 6:19-21)

Никтоже может двема господинома работати: любо единаго возлюбит, а другаго возненавидит: или единаго держится, о друзем же нерадити начнет. Не можете Богу работати и мамоне.

Сего ради глаголю вам: не пецытеся душею вашею, что ясте, или что пиете: ни телом вашим, во что облечетеся. Не душа ли болши есть пищи, и тело одежди?

Воззрите на птицы небесныя, яко не сеют, ни жнут, ни собирают в житницы, и Отец ваш Небесный питает их. Не вы ли паче лучши их есте? Кто же от вас пекийся может приложити возрасту своему лакоть един? И о одежди что печетеся? Смотрите крин селных, како растут: не труждаются, ни прядут: глаголю же вам, яко ни Соломон во всей славе своей облечеся, яко един от сих. (Мф. 6:24-29)

Не пецытеся убо, глаголюще: что ямы, или что пием, или чим одеждемся? Всех бо сих языцы ищут: весть бо Отец ваш Небесный, яко требуете сих всех.

Ищите же прежде Царствия Божия и правды Его, и сия вся приложатся вам. Не пецытеся убо на утрей, утрений бо собою печется: довлеет дневи злоба его. (Мф. 6:31-34)

Аще ли хощеши внити в живот, соблюди заповеди. Глагола Ему: кия? Иисус же рече: еже, не убиеши: не прелюбы сотвориши: не украдеши: не лжесвидетелствуеши: чти отца и матерь: и: возлюбиши искренняго твоего яко сам себе. (Мф. 19:17-19)

Возлюбиши Господа Бога твоего всем сердцем твоим, и всею душею твоею, и всею мыслию твоею: сия есть первая и болшая заповедь

Вторая же подобна ей: возлюбиши искренняго твоего яко сам себе: в сию обою заповедию весь закон и пророцы висят.

Cе бо есть закон и пророцы, внидите узкими враты: яко пространная врата и широкий путь вводяй в пагубу, и мнози суть входящии им: что узкая врата, и тесный путь вводяй в живот, и мало их есть, иже обретают его. (Мф. 7:12-14)

От дний же Иоанна Крестителя доселе Царствие Небесное нудится, и нуждницы восхищают его._ (Мф. _11:12)

Мнози бо суть звани, мало же избранных. (Мф. 20: 16)

Бдите убо, яко не весте, в кий час Господь ваш приидет. Сие же ведите, яко аще бы ведал дому владыка, в кую стражу тать приидет, бдел убо бы и не бы дал подкопати храма своего. Сего ради и вы будите готови: яко, в оньже час не мните, Сын Человеческий приидет. (Мф. 24:42-44)

Аминь бо глаголю вам: аще имате веру яко зерно горушно, речете горе сей: прейди отсюду тамо, и прейдет: и ничтоже невозможно будет вам. (Мф. 17:20)

Просите, и дастся вам: ищите, и обрящете: толцыте, и отверзется вам: всяк бо просяй приемлет, и ищяй обретает, и толкущему отверзется. (Мф. 7:7-8)

Аминь глаголю вам, аще не обратитеся и будете яко дети, не внидете в Царство Небесное: иже убо смирится яко отроча сие, той есть болий во Царствии Небеснем. (Мф. 18:3-4)

И всяк, иже оставит дом, или братию, или сестры, или отца, или матерь, или жену, или чада, или села, имене Моего ради, сторицею приимет и живот вечный наследит. (Мф. 19:29)

Аще хощет в вас вящший быти, да будет вам слуга: и иже аще хощет в вас быти первый, буди вам раб. (Мф. 20:26-27)

В четвертую же стражу нощи иде к ним Иисус, ходя по морю. И видевше Его ученицы по морю ходяща, смутишася, глаголюще, яко призрак есть: и от страха возопиша. Абие же рече им Иисус, глаголя: дерзайте: Аз есмь, не бойтеся. Отвещав же Петр рече: Господи, аще Ты еси, повели ми приити к Тебе по водам. Он же рече: прииди. И излез из корабля Петр, хождаше по водам, приити ко Иисусови: видя же ветр крепок, убояся, и начен утопати, возопи, глаголя: Господи, спаси мя. И абие Иисус простер руку, ят его и глагола ему: маловере, почто усумнелся еси? (Мф. 14:25-31)

Егда же гонят вы во граде сем, бегайте в другий

И не убойтеся от убивающих тело, души же не могущих убити. (Мф. 10:23,28)

Прежде же сих всех возложат на вы руки своя и ижденут, предающе на сонмища и темницы, ведомы к царем и владыкам, имене Моего ради: Предани же будете и родители и братиею и родом и други, и умертвят от вас: и будете ненавидими от всех имене Моего ради: и влас главы вашея не погибнет: в терпении вашем стяжите душы вашя. (Лк. 21:12,16-19)

Претерпевый же до конца, той спасен будет. (Мф. 10:22)

— Из книги «Цветник священноинока Дорофея»